Европа во моментов не е во „предвоена“ ситуација, туку во „вистинска војна“ против Русија, изјави вчера за Скај њуз поранешниот директор на британската разузнавачка служба МИ-6, Сер Ричард Деарлав.
„Мислам дека треба да се соочиме со фактот дека Русите мислат дека се во војна со нас“, рече Деарлав.
Неговата изјава доаѓа неколку дена откако полскиот премиер Доналд Туск предупреди дека Русија, во контекст на нејзината целосна војна во Украина, може да ескалира на ниво на „глобален конфликт“.
Според Деарлав, конфликтот веќе ги преминал границите на Украина.
„Доналд Туск тоа го нарекува предвоена ситуација. Мислам дека греши. Мислам дека тоа е вистинска војна“, вели Деарлав.
Деарлав додаде дека Русија води хибридна војна против Европа на повеќе фронтови, вклучувајќи саботажа и „многу агресивни потези“.
– Директорите на разузнавањето во Европа, САД и Велика Британија ја окарактеризираа Русија како „непредвидлива“, рече тој.
Руските специјални служби се поврзани со саботажа низ Европа, вклучувајќи сајбер напади, шпионажа и мешање во изборите. Откако Финска влезе во НАТО во 2023 година, таа се пожали на интензивирање на руските хибридни напади на нејзината граница.
Како што расте руската агресија, западната коалиција се соочува со можност за поделба, бидејќи претстојната инаугурација на американскиот претседател Доналд Трамп сигнализира промена во поддршката на Вашингтон за Европа, НАТО и Украина.
Западните земји сега се во „многу опасна ситуација“, рече Деарлав.
Додека Деарлав истакна дека би било пожелно Западот да преговара со Кремљ, тој предупреди дека рускиот претседател Владимир Путин најверојатно нема да соработува.