Во Виена денеска почнува Петтиот глобален форум на Сојузот на цивилизациите на Обединетите нации, кој е основан во 2005 година под покровителство на ОН и претставува обид да се спречат поларизацијата и екстремизмот преку соработка и дијалог, независно од националните и културните граници.
Овие форуми претставуваат средби на највисоко ниво. По Мадрид (2008), Истанбул (2009), Рио де Женеиро (2010) и Доха (2011) оваа година Виена е домаќинот на дводневните разговори на повеќе од илјада претставници на 135 членки на сојузот.
На форумот ќе учествува и генералниот секретар на ОН Бан Ки-мун, политички лидери, меѓу кои и државните и владините раководители на Македонија и Турција, министрите за надворешни работи на Иран, Ирак, Индија, Пакистан, Бангладеш и Авганистан, како и претставници на цивилното општество, на медиумите и на научните кругови од целиот свет.
Под мотото „Одговорност, разноликост и дијалог“ ќе бидат разгледани актуелни прашања на темите слобода на религиите, плурализмот, слободата и улогата на медиумите, миграции, интеграција и разноликост.