Генералниот секретар на ОН Бан Ки-мун „и натаму е уверен дека употребата на хемиско оружје на било која страна во Сирија под било кои околности претставува страшно злосторство“, соопшти светската организација.
Сириската Влада и бунтовниците кои против неа се борат, вчера меѓусебно се обвинуваа за употребата на хемиското оружје во близина на Алепо, на северот на Сирија, првпат од избивањето на судирите во земјата пред две години.
Бан и Ахмет Измиџи, генерален директор на Организацијата за забрана на хемиско оружје „многу се загрижени поради наводната употреба на хемиско оружје во Сирија“, наведоа ОН во соопштение по нивната средба.
Портпаролот на ОН Мартин Несирки рече дека „ОН се запознаени со извештајот“ дека во Сирија се користи хемиско оружје, но „дека не се во можност да ја проверат таа информација“.
Во меѓувреме, Светската здравствена организација (СЗО) соопшти дека денеска ќе испрати залихи на лекови и медицинска опрема во сирискиот град Алепо, но не можеше да потврди дали таму е употребено хемиско оружје или некој друг отров.