ОН се подготвени да ја помогнат обновата на Појасот Газа последен пат, предупреди денеска генералниот секретар на светската организација Бан Ки-мун.
Отворајќи го специјалниот состанок на Генералното собрание на ОН, Бан апелираше на траен мир, во момент кога 72-часовниот хуманитарен прекин на огнот меѓу Израел и Хамас се одржува втор ден по ред.
– Безумниот циклус на страдања во Газа и на Западниот Брег, како и во Израел, мора да се оконча, рече Бан.
По три војни во Газа во последните шест години, Бан предупреди дека трпението на светот со Израелците и Палестинците е на испит.
– Дали мораме да продолжиме така – гради, уривај и гради и уривај?, запраша Бан. Тој додаде оти повторно ќе градат, но ова мора да биде последен пат – да се обновува. Ова мора сега да престане.