Организацијата „Исламска држава“ е закана за целиот Блиски исток, изјави францускиот претседател Франсоа Оланд отворајќи ја меѓународната конференција за мир и безбедност во Ирак што се одржува во Париз.
– Одговорот против џихадистите треба да биде глобален, нагласи Оланд.
Претседателот на Франција ги повика западните и арапски држави да се ангажираат „јасно, лојално и силно на страната на ирачките власти“.
Тој додаде дека „нема време за губење“ пред лицето на заканата од џихадистите.
Оланд побара од државите учеснички во конференцијата да ја поддржат со „сите средства“.
– Хаосот работи во корист на терористите. Затоа треба да ги поддржиме сите кои може да ги направат компромисите за обезбедување иднина на Сирија, нагласи Оланд.
На меѓународната конференција учествуваат министри за надворешни работи од околу 30 држави меѓу кои и петте постојани членки на Советот за безбедност на Обединетите нации и соседите на Ирак, Катар, Саудиска Арабија, Кувајт и Обединетите Арапски Емирати.