САД одделуваат уште 155 милиони долари хуманитарна помош за Сирија, изјави американскиот претседател Барак Обама.
– Сакам да говорам директно на сирискиот народ. Таа нова помош ќе значи уште топла облека за децата и лекови за возрасните, брашно и жито за младите семејства и обувки и греење за луѓето кои живеат во полуразурнати згради, изјави Обама во видео-обраќање до сирискиот народ со арапски превод.
Обраќањето беше направено во пресрет на меѓународната донаторска конференција што ќе се одржи утре во Кувајт под покровителство на ОН за спас на милиони Сиријци, соочени со хуманитарна катастрофа.
Вкупниот износ на помошта, одделена од САД за хуманитарните потреби во Сирија, веќе достигна 365 милиони долари.