Американскиот претседател Барак Обама порача дека Вашингтон ќе преземе мерки против Русија поради наводното мешање во изборната кампања во САД, нагласувајќи дека за тоа разговарал директно со рускиот претседател Владимир Путин.
– Потребна ни е акција и тоа ќе го сториме, рече Обама за Американското национално радио (НПР).
– Сметам дека нема сомневање во тоа дека кога која било странска влада се обидува да влијае врз интегритетот на нашите избори, мораме да преземеме акција и тоа ќе го сториме на начин и во период кога ние ќе избереме, порача Обама.
Тој нагласи дека нешто од сето тоа „може да биде експлицитно и јавно објавено, а нешто не“.
– Господинот Путин е мошне свесен што мислиме за тоа, бидејќи директно со него разговарав на таа тема, наведе Обама.
Белата куќа вчера сугерираше дека Путин бил директно вклучен во хакирањето, кое има цел да влијае врз американските избори и да ја овозможи победата на Доналд Трамп.