Бурата Киран ја погоди Велика Британија, метеоролозите предупредуваат дека животите би можеле да бидат загрозени, додека некои компании ги повикаа работниците да работат од дома.
Невремето ги погоди Британските и Каналските Острови, носејќи силен дожд и силни налети на ветер.
Во јужна Англија се очекуваат силни ветрови и обилни врнежи од дожд, а на Каналските Острови ќе има налети над 100 милји на час.
Училиштата во Саутемптон се советувани да затворат во четврток.
Низ Каналските Острови, училиштата и аеродромите ќе бидат затворени во четврток.
Жолти, портокалови и црвени временски предупредувања – што укажуваат на потенцијален ризик по животот и имотот – се издадени со 27 предупредувања за поплави во Англија.
Метеоролозите предупредуваат дека невремето може да трае дури три дена.
Да потсетиме, пред само две недели бурата Бабет ја погоди Велика Британија. Донесе исклучителни врнежи од дожд во делови од источна Шкотска, додека силен и постојан дожд погоди и голем дел од Англија, Велс и Северна Ирска.
Илјадници домови беа погодени од поплавите, а најмалку седум лица загинаа во невремето.