Неколку часа пред американските избори на средината од мандатот, Врховниот суд експресно го одби барањето на администрацијата на претседателот Доналд Трамп да се блокира броењето на гласачките ливчиња на повеќе од 20.000 регистрирани гласачи во Калифорнија, за кои федералните власти тврдат дека не се државјани на САД.
Ова претставува уште еден правен пораз за Трамп во момент кога Републиканците се борат да ја задржат контролата врз Конгресот. Калифорнија е најнаселената сојузна држава и, истовремено, упориште на Демократите.
Во пресрет на изборите, администрацијата на Трамп го насочи вниманието кон лица за кои се тврди дека не се државјани. „Откако Калифорнија ќе ги измеша нелегалните со легалните гласачки ливчиња, не постои начин да се издвојат оние што се нелегални“, се наведува во поднесокот на Министерството до судот.
Беше побарано Калифорнија да ги одвои спорните од неспорните гласачки ливчиња и да не ги брои додека не се утврди дали гласачите се државјани на САД.
„Ќе продолжиме да ги користиме сите можни правни средства за да го заштитиме интегритетот на нашите избори и да обезбедиме спроведување на федералните закони“, напиша на социјалните мрежи вршителот на должноста јавен обвинител, Трент Мекотер.
Според Уставот на САД, сојузните држави се одговорни за спроведување на изборите, иако федералната влада има овластување да врши надзор. Во септември, Врховниот суд го одби барањето на администрацијата на Трамп за ограничување на гласањето по пошта, кое традиционално им оди во прилог на Демократите.
Министерството за внатрешна безбедност состави список од 20.000 гласачи кои ги смета за сомнителни и го испрати до властите во Калифорнија и во округот Лос Анџелес.
Во одговорот до судот, Калифорнија тврди дека има воспоставено строги правила за да се спречи гласање на лица кои не се државјани, како и дека списокот на Министерството е неточен и полн со грешки.
Денес, на 3 ноември, Американците избираат 435 членови на Претставничкиот дом и 35 сенатори – 33 преку редовни избори и двајца преку вонредни избори. Во голем број сојузни држави се одржуваат и избори за гувернери, како и за други државни и локални функции.
Републиканците моментално имаат контрола врз двата дома на Конгресот, иако во Претставничкиот дом имаат само тесно мнозинство. Демократите се обидуваат да освојат доволно места за да преземат контрола над барем еден од двата дома, со што би ја ограничиле можноста на Трамп да ги спроведува своите политики во текот на преостанатите две години од неговиот мандат.
Клучните прашања во кампањата ги вклучуваат високите трошоци за живот, состојбата на економијата, имиграцијата и војната во Иран. Според „Ројтерс“, достапноста на основните животни потреби е една од најголемите грижи за голем дел од гласачкото тело.
Калифорнија има 52 места во Претставничкиот дом – повеќе од која било друга сојузна држава. Демократите имаат за цел да го преземат мнозинството од републиканците, за што им е потребно нето зголемување од четири места.
Доколку ја преземат контролата врз Претставничкиот дом, демократите ќе можат да иницираат конгресни истраги за администрацијата на Трамп и да го попречат усвојувањето на закони поддржани од претседателот. Републиканците, пак, се обидуваат да ја задржат контролата врз двата дома на Конгресот, за Трамп да може да продолжи со спроведувањето на својата политичка агенда.
Одлуката на Врховниот суд значи дека од Калифорнија не се бара да издвои повеќе од 20.000 оспорени гласачки ливчиња, како што бараше администрацијата на Трамп. Сепак, Судот не утврди дали сите гласачи на списокот се државјани на САД; наместо тоа, тој одби итно да интервенира во процесот на броење на гласовите.