Судирите меѓу полицијата и имигранти во Стокхолм се проширија во неколку други населби претежно населени со имигранти.
Немирите почнаа пред три дена откако шведската полиција усмрти постар маж имигрант.
Според соопштението на шведската полиција во немирите досега се приведени осум лица кои учествувале во напади врз полицијата, додека едно лице е уапсено под сомнение за предизвикан пожар во зграда на локалниот културен центар.
Повеќе десетици млади во знак на протест против полицијата, која на 13 мај уби 69-годишен маж во населбата Хусби, фрлаа со камења врз полицијата и палеа продавници и автомобили.
Според полицијата во нередите се оштетени и запалени околу 30 возила во неколку населби во Стокхолм, во кои живеат мнозинство имигранти.
Голем број граѓани ја обвинуваат полицијата дека без причина усмртила постар маж имигрант.
Шведските експерти сметаат дека немирите во населбите со мнозинство имигранти се должи на зголемениот број невработени и ниското образование на имигрантите, како и растот на расистичките ставови во земјата.