Генералниот секретар на НАТО, Јенс Столтенберг по состанокот со министрите за одбрана на државите членки изјави дека е донесена одлука за формирање на нова единица за брза реакција, таканаречена „ударна тупаница“ и поставување на шест командни центри долж источната граница на Алијансата.
-Се договоривме за силата и составот на „ударната тупаница“ – рече тој и потенцира дека станува збор за единица од 4.000-5.000 лица, која во рок од 48 часа може да реагира на каква било закана на членките на НАТО.
Освен тоа на состанокот е донесена одлука во Романија, Бугарија, Полска и три балтички држави да се постават штабови и командни центри за прифаќање на оваа единица, чие што име е Заеднички сили за доста висока подготвеност со англиски акроним ВЈТФ.
-Тоа ќе обезбеди „ударната тупаница“ да биде долгорочно одржлива – нагласи Столтенберг и додаде дека основата ќе ја сочинуваат контингенти од Франција, Италија, Германија, Британија и Полска, додека источно европските сојузници ќе бидат задолжени за логистичка помош.
Формирањето на ВЈТФ и прифатните бази на источните граници на НАТО беше договорено на самитот во септември кој се одржа во Велс, но државите членки дури сега успеаа да се согласат со деталите за планот и придонесите за заедничкиот проект.
Столтенберг истакна и дека НАТО нема намера да испрати вооружена помош на Украина, но дека индивидуално тоа може да го направи секоја нејзина членка.
Е. Г.