Врховниот водач на Иран, ајатолахот Али Хамнеи денеска ги повика муслиманските земји да го прекинат извозот на нафта и храна во Израел, истовремено барајќи прекин на бомбардирањето на Појасот Газа, објавија државните медиуми.
„Мора веднаш да престане бомбардирањето на Газа, мора да се запре извозот на нафта и храна за ционистичкиот режим“, рече верскиот водач.
По нападот на Хамас на 7 октомври врз населбите и кибуците на југот од земјата и учесниците на музички фестивал, во кој за еден ден беа убиени 1.400 луѓе, а беа киднапирани 239, Израел прогласи воена состојба и започна бомбардирање без преседан и опсада на палестинската енклава.
Палестинското Министерство за здравство, кое е под надзор на Хамас, тврди дека во израелските напади досега загинале околу 8.000 луѓе. Хамас е сунитска исламистичка група поддржана од Техеран и која САД и ЕУ ја сметаат за терористичка група.
Иранските верски водачи го предупредуваат Израел на ескалација доколку не ја прекине својата агресија врз Палестинците и се закануваат дека другите групи во регионот поддржани од Исламската Република ќе интервенираат во конфликтот.