Мерките на ЕУ не доведоа до обновување на важните морски екосистеми, а Средоземното Море е особено изложено на ризик. Тоа се нагласува во новиот тематски извештај објавен денеска од Европскиот суд на ревизори.
Рамката за животна средина на ЕУ се занимава со премногу проблеми површно за да се овозможи враќање на добриот статус на животната средина во морињата, а финансирањето на ЕУ ретко се користи за поддршка на зачувување на морски видови и живеалишта.
Ревизорите открија дека морските заштитени подрачја всушност добиваат ограничена заштита и дека прекумерниот риболов продолжува, особено во Средоземното Море, се вели во соопштението на Судот.
Прекумерниот риболов не само што им штети на одделни видови, туку редовно ги уништува мрежите на целата морска храна и на тој начин им штети на морските екосистеми како целина.
ЕУ е посветена на заштитата на морското опкружување преку спроведување на нејзините политики за животна средина и риболов. Главните еколошки политики на ЕУ се утврдени во Рамковната директива за морска стратегија, Директивата за птици и Директивата за живеалишта и вклучуваат воспоставување мрежа на морски заштитени подрачја.
Целта на Заедничката политика за риболов на ЕУ е да се осигури дека риболовните активности се еколошки одржливи и да се минимизираат нивните негативни ефекти врз морскиот екосистем.