Меѓународниот кривичен суд во Хаг минатата недела издаде налог за апсење на Владимир Путин.
Хашкиот суд издаде налог за апсење на рускиот претседател поради сомнение дека е одговорен за нелегална депортација на деца и илегално пренесување на луѓе од територијата на Украина во Руската Федерација.
Меѓународниот кривичен суд (МКС), покрај Путин, издаде и налог за апсење на неговата комесарка за правата на децата, Марија Алексеевна Лвова-Белова, по истите обвиненија за нелегална депортација на украински деца.
Судиите на претходна постапка на МКС оценија дека постојат „разумни основи да се верува дека двајцата осомничени сносат одговорност за военото злосторство илегална депортација на населението и незаконско префрлање на населението од окупираните територии на Украина во Руската Федерација, на штета на украинските деца“. Судиите размислуваа за издавање тајни налози за апсење, но заклучија дека нивното објавување може да „придонесе за спречување на понатамошни злосторства“.
Поранешниот руски претседател Дмитриј Медведев изјави дека одлуката на Меѓународниот кривичен суд (МКС) да издаде налог за апсење на Владимир Путин ќе има сериозни последици за меѓународното право.
„Тие одлучија да му судат на претседателот на нуклеарна сила што не е дел од МКС по истите основи како САД и другите земји. Последиците за меѓународното право ќе бидат монструозни“, напиша Медведев на Телеграм.