Дмитриј Медведев, заменик-претседател на Советот за безбедност на Русија, денеска изјави дека раководството во Киев е „слепо, изгубено и во паника“ без американските разузнавачки податоци, оценувајќи дека таков развој на настаните бил очекуван поради – како што тврди тој – несоодветниот однос на украинските власти кон нивните сојузници.
„’Зелената вошка’ е незадоволна поради недостигот на разузнавачки информации од Американците. Без нив, тој е слеп, изгубен и во паника. А што очекуваше? Кога се однесуваш арогантно кон своите спонзори, тие се лутат“, напиша Медведев на социјалните мрежи, а пренесе „Спутник“.
Тој додаде дека американскиот претседател Доналд Трамп не е како поранешниот германски канцелар Олаф Шолц и не сака да биде предмет на потсмев или да трпи напади од оние што ги нарече „пијавици“.
Претходно денеска, коментирајќи ги последиците од руските напади врз Киев, украинскиот претседател Володимир Зеленски изјави дека Украина не добила разузнавачки информации во врска со лансирањето балистички ракети.
Медиумите подоцна објавија дека американската страна го припишала отсуството на овие информации на неповолните временски услови.