Насилство врз мирни демонстранти и новинари е неприфатливо, без разлика дали тоа се случува во САД или на друго место, нагласи францускиот министер за надворешни работи, Жан-Ив Ле Дријан, коментирајќи ги протестите во САД за смртта на Афроамериканецот Џорџ Флојд за време на полициска операција во Минеаполис.
Во интервју за францускиот весник „Телеграм“, Ле Дријан рече дека е неопходно да им се овозможи на луѓето слободно да протестираат.
„Каков било чин на насилство против мирни демонстранти или новинари е неприфатливо, во САД или на друго место“, истакна тој.
Флојд почина на 25 мај за време на апсење, кога полицаец му го притисна вратот со коленото повеќе од осум минути, а неговата смрт предизвика протести против расна дискриминација и полициска бруталност низ САД и во светот.