Американскиот државен секретар Џон Кери го повика денеска Хамас да го прифати египетскиот предлог за прекин на огнот со Израел во Појасот Газа.
Во краткото соопштение од Стејт департментот, Кери ја поздрави одлуката на Израел да го прифати овој план.
– Египетскиот предлог за прекин на огнот и преговори дава можност да се прекине насилството и повторно да се врати мирот. Ја поздравуваме одлуката на израелскиот кабинет да го прифати. Ги повикуваме другите страни да го прифатат предлогот, истакна Кери.
Кабинетот на израелскиот премиер Бенјамин Нетанјаху соопшти дека Владата утрово се сретнала и го прифатила планот, кој стапува во сила денеска од девет часот по локално време.