Во месеците во кои британското општество беше во карантин, на врвот на епидемијата на коронавирусот, на секои тројца луѓе кои починале од Ковид-19, починале двајца кои не можеле да добијат помош поради рестриктивните мерки и преполнетите клиники или се плашеле да одат во болница поради епидемијата, покажува официјален документ на британската влада.
Според бројките на здравствените власти, во Британија до 1 мај починале вкупно 16.000 луѓе кои не можеле да добијат соодветна лекарска нега, додека 6.000 починале затоа што не се јавиле на лекар од страв дека ќе се заразат со коронавирус, се вели во документот на владината Научна советничка група за итни случаи.
Податоците на Министерството за здравство и на Националното статистичко биро покажуваат и дека починале дополнителни 10.000 луѓе кои се отпуштени од болница за време на пандемијата. Телото на британската влада прогнозира дека уште 26.000 луѓе би можеле да починат во следните месеци поради мерките за карантин и рестрикциите во здравството.
Како позитивна страна на карантинот, во документот се наведува тоа што благодарение на мерките, сочувани се 2.500 животи кои би биле изгубени како последица на сообраќајни и други незгоди, загадувањето на воздухот и други причини.