Претседателот на Европската комисија Жан-Клод Јункер денеска ја предупреди Москва дека границите на ЕУ се „недопирливи“, нагласувајќи дека безбедноста на државите во ЕУ е неприкосновена.
– Безбедноста и границите на земјите членки на ЕУ се недопирливи и сакам тоа јасно да се разбере во Москва. Полска, балтичките држави и сите други се многу важни земји членки на ЕУ и тие не треба да мислат дека нема да бидеме таму за нив. Имаме обврска да ја штитиме безбедноста на сите, изјави Јункер во Европскиот парламент.
Јункер, нагласи дека овие европски земји треба сериозно да разберат дека солидарноста не е празен збор и дека ЕУ е таму и дека ќе биде таму, ако некогаш е потребно.
– ЕУ мора јасно да покаже на Русија кои се трошоците за конфронтација, но исто така, мора јасно да стави до знаење дека е подготвена да се ангажира, нагласи Јункер.
Јункер денеска на пленарната седница на Европскиот парламент во Стразбур ја претстави својата порака „За состојбата на унијата“.
Во своето обраќање претседателот на ЕК зборуваше и за бегалската криза, заканата од групата ИД, Западен Балкан, миграцијата од африканските земји и состојбата во Украина.