Индиските власти започнаа целосна истрага за несреќата во која загинаа 241 од 242 патници и членови на екипажот на летот на Ер Индија од Ахмедабад до Лондон, соопштија вчера официјални лица, објави АП.
Авионот, кој летал од Ахмедабад до Лондон, се урна во густо населена станбена област, предизвикувајќи пожар и убивајќи голем број цивили на земја, вклучувајќи неколку студенти во блискиот студентски дом на медицински колеџ.
Индискиот премиер Нарендра Моди го посети местото на несреќата и болницата во Ахмедабад каде што се лекуваат повредените, и треба да одржи итен состанок со врвните безбедносни и транспортни службеници подоцна во текот на денот.
Министерот за цивилно воздухопловство Рам Мохан Наиду изјави дека Бирото за истрага на воздушни несреќи отворило формална истрага во согласност со меѓународните стандарди пропишани од Меѓународната организација за цивилно воздухопловство (ICAO).
Се очекува да пристигне американски истражен тим, вклучувајќи претставници од Националниот одбор за безбедност во сообраќајот (NTSB), Федералната администрација за воздухопловство (FAA), Боинг и Џенерал Електрик.
Единствениот преживеан патник е идентификуван како Вишваскумар Рамеш и моментално е хоспитализиран.
Според докторот Давал Гамети, Рамеш има повеќекратни повреди, но неговата состојба не е опасна по живот.
Тој рече дека авионот почнал да губи висина кратко по полетувањето, а потоа одеднаш се преполовил пред да експлодира, објавува АП.
Во несреќата учествувал 12 години стар Боинг 787 Дримлајнер.
Иако причината за несреќата сè уште е под истрага, експертите велат дека ова е првата фатална несреќа на моделот откако стапил во употреба пред 16 години.
Моментално има околу 1.200 вакви авиони во употреба низ целиот свет.