Генералниот секретар на Обединетите нации (ОН) Антонио Гутереш денеска повика на ослободување на сите заложници и прекин на војната во Појасот Газа, откако во палестинската енклава беа откриени телата на шестмина заложници.
„Никогаш нема да ја заборавам мојата средба минатиот октомври со родителите на Херш Голдберг-Полин и другите заложнички семејства. Денешната трагична вест е поразителен потсетник за потребата од безусловно ослободување на сите заложници и крај на кошмарот на војната во Газа“, изјави Гутереш.
Телата на шестмината заложници киднапирани од Хамас на 7 октомври минатата година се пронајдени во тунел во областа Рафа во Појасот Газа, соопшти претходно денеска израелската армија.