Генералниот секретар на ОН Антонио Гутереш го повика Советот за безбедност да го продолжи одобрението за испорака на помош од Турција за милиони луѓе на кои им е потребна во северозападна Сирија.
– Не можеме да се откажеме од сирискиот народ, порача Гутереш.
Мандатот на ОН, кој овозможи испораки од Турција во северозападна Сирија, контролирана од опозицијата, истекува на 10 јули.
Русија, сојузник на Сирија, верува дека долгорочната операција го нарушува суверенитетот и територијалниот интегритет на Сирија и бара да се доставува поголема помош од внатрешноста на земјата.
– Силно ги повикувам членовите на Советот да го задржат консензусот за овозможување прекугранични операции. Морален императив е да се одговори на страдањето и ранливоста на 4,1 милиони луѓе во областа, на кои им е потребна помош и заштита, рече Гутереш.
Тој рече дека 80 отсто од оние кои имаат потреба во северозападна Сирија се жени и деца.
Околу 800 камиони месечно испорачуваат помош од Турција како дел од операцијата на ОН, а Гутереш бара операцијата да се продолжи за една година.
Извор: МИА