Дел од вработените во германските дипломатски претставништва денеска ја напуштија Русија, соопшти германското Министерство за надворешни работи без да го прецизира нивниот број.
Портпаролката на руското Министерство за надворешни работи, Марија Захарова, на крајот на април на ТВ каналот Звезда изјави дека повеќе од 20 германски дипломати ќе бидат протерани од Русија како одговор на протерувањето на руските дипломати од Германија, пренесува Тас.
„Германската влада беше во контакт со руската страна во последните неколку недели со цел да се намали присуството на руски специјални служби во Германија“, се вели во извештајот на германското министерство.
Како резултат на тоа, некои вработени во дипломатските претставништва ја напуштија Германија кон средината на месецот.
Нивните активности не беа во согласност со дипломатскиот статус, соопштија од прес-службата на германската страна.
„За возврат, руската влада побара сличен број вработени во германските мисии да ја напуштат земјата. Тие ја напуштија Русија денеска, 1 мај“, соопшти Министерството.
Германскиот весник „Билд“ претходно пишуваше, повикувајќи се на неименувани извори, дека 34 од околу 90 германски дипломати кои работат во Русија морале да ја напуштат земјата.