Западните санкции кон Русија ќе бидат укинати дури откако Москва ќе го исполни Договорот од Минск за прекин на огнот и ќе го почитува суверенитетот на Украина, порачаа министрите за надворешни работи на Групата седум индустриски најразвиени земји во светот (Г-7), од нивната денешна средба во северногерманскиот град Либек.
– Г-7 ја истакнува блиската поврзаност на целосното спроведување на Договорот од Минск и меѓународните санкции (кон Русија), се наведува во заедничкото соопштение издадено по завршувањето на министерската средба.
Во документот се посочува дека должината на траењето на санкциите зависи од „руската целосна примена на Договорот од Минск, потпишан во февруари и од почитувањето на украинскиот суверенитет“.
Министрите ги поздравија Украина и Русија поради „преземањето на вистинските чекори“ во спроведувањето на договорот за прекин на огнот, но потенцираат дека е „неопходен значаен и брз напредок“ по тоа прашање.
Учесниците на министерската средба на Г-7 го поздравија и постигнувањето на рамковниот договор меѓу Иран и меѓународната „шесторка“ за иранската нуклеарна програма и го повикаа Техеран на целосна соработка со Меѓунардоната агенција за атомска енергија при проверката на неговите „нуклеарни активности“.
Во завршната изјава се поддржуваат и напорите на Иран и „шесторката“ за постигнување конечен договор за нуклеарната програма до 30 јуни.
Како што јавија германските медиуми, средбата во Либек има за цел да го подготви самитот на шефовите на држави или влади на Г-7, што треба да се одржи во јуни во баварскиот замок Елмау.
На средбата во Либек учествуваа шефовите на дипломатиите на Германија, Велика Британија, Италија, Јапонија, Канада, САД и Франција, како и високиот претставник на ЕУ за надворешна политика и безбедност, Федерика Могерини.