Саудиска Арабија и Франција повикаа денеска договорот за иранската нуклеарна програма да обезбеди Техеран да не ја поткопа регионалната рамнотежа и да не претставува закана за соседите.
– Франција и Саудска Арабија ја потврдуваат неопходноста за постигнување траен и обврзувачки договор со Иран. Со таков договор не смее да се дестабилизира безбедноста и стабилноста на регионот ниту да има закани за безбедноста и стабилноста на иранските соседи, наведуваат двете држави во соопштение.
Франција е меѓу групата држави која обезбеди преоден договор со Иран што треба да се потпише до 30 јуни.
Соопштението е објавено во време кога францускиот претседател Франсоа Оланд е во посета на Ријад. Оланд денеска ќе присуствува на состанокот на Советот за заливска соработка што се одржува во саудискиот главен град.