Францускиот претседател Емануел Макрон ги повика европските и африканските држави да го забрзаат создавањето на регионални сили кои ќе се борат против исламистичките групи во Африка.
На средбата во замокот Сел Сен Клу во близината на Париз беше посочено дека најзагрозени држави се Мали, Нигер, Буркина Фасо, Мавританија и Чад, каде дејствуваат исламистички групи.
Покрај Макрон, на средбата учествуваат и германската канцеларка Ангела Меркел, италијанскиот премиер Паоло Џентолони и белгискиот премиер Шарл Мишел, а ќе присуствуваат и претставници на Саудиска Арабија, Обединетите Арапски Емирати и САД.
Веќе е формиран штаб и извршена е првата воена операција во која учествувале неколку стотици војници од Буркина Фасо, Нигер и Мали. Се предвидува создавање на вооружени сили со 5 илјади војници, кои би дејствувале во посочените африкански држави.