Министрите за надворешни работи од земјите на ЕУ денеска воведоа нови санкции кон Иран поради кршење на човековите права, јави ДПА.
Забрани за патување и замрзнување на банкарските сметки се воведени за девет лица. Средствата на институции од јавниот сектор, кои исто така се поврзани со непочитување на правата, ќе бидат замрзнати, изјавија дипломати во Брисел.
Имињата на институциите и поединците ќе бидат објавени утре во Службениот весник на ЕУ, кога санкциите ќе стапат во сила.
Шефовите на дипломатиите, исто така, денеска ги продолжија за една година претходните санкции против Иран за кршење на човековите права, кои ќе траат до април 2014 година. Вкупно 87 лица сега се соочуваат со забрани за патување и сметките им се замрзнати.
Шведскиот министер за надворешни работи Карл Билд ги поздрави преземените мерки против Иран, сметајќи ги за „апсолутно оправдани“.