Високиот претставник на ЕУ Кетрин Ештон и рускиот министер за надворешни работи Сергеј Лавров, го поддржаа пратеникот на ОН Лакдар Брахими на патот за воспоставување на дијалог во Сирија.
Во соопштението на Кетрин Ештон по средбата со Лавров, се наведува дека ЕУ е охрабрена од неодамнешната иницијатива за политички дијалог инициран од лидерот на опозицијата, Шеик Моаз ел Катиб и дека се надева дека претставниците на сирискиот режим нема да ја пропуштат оваа можност да придонесат за ставање крај на насилството.
Лавров и Ештон разговарале и за претстојното продолжување на преговорите со Иран, а високиот претставник на ЕУ за заедничка надворешна и безбедносна политика, изразила надеж дека Иран ќе биде флексибилен во новата рунда која е закажана за 26 февруари.
Ештон нагласила дека е итно потребно продолжување на мировниот процес на Блискиот Исток, а темите на разговор со рускиот министер биле и Грузија, Нагорно-Карабах и Придњестровје, како и односите меѓу ЕУ и Русија.