Откако вчера израелскиот премиер Бенјамин Нетанјаху индиректно испрати порака до Турција, велејќи дека оние кои сонуваат за обнова на империите нема да успеат, тој доби одговор од Анкара.
– Иронично е што израелските лидери зборуваат за империјалистичките амбиции на другите во овој регион, додека тие штотуку извршија еден од најлошите геноциди во историјата, напиша Бурханетин Дуран, портпарол на турскиот претседател Реџеп Таип Ердоган, на мрежата X.
Тој додаде дека Израел е дестабилизирачка сила, „а нивната долгогодишна хистерија за моќта и влијанието на Турција е едноставно комична. Под водство на претседателот Ердоган, Турција беше извор на стабилност и мир. Спротивно на тоа, владата на Нетанјаху донесе крв и солзи во регионот“, рече тој.
Дуран го обвини Израел дека „се обидува да ги прикрие своите територијални амбиции како барања за национална безбедност, бидејќи останува окупаторска сила во Палестина и Сирија“.
Тој вели дека „никаква евтина реторика и смешни изјави како оние на израелскиот премиер нема да нè одврати од поддршката на нашите палестински браќа и сестри“.
Патем, по падот на режимот на Асад во Сирија, Израел изрази длабока загриженост за зајакнувањето на Турција во земјата. Израел, исто така, остро се спротивстави на желбата на Турција да игра улога во Меѓународните сили за стабилизација што ќе бидат распоредени во Газа следната година.