Израелскиот опозициски лидер Јаир Лапид остро го критикуваше премиерот Бенјамин Нетанјаху откако Американците и Иранците се согласија на двонеделен прекин на огнот.
– Никогаш не сме имале толку голема дипломатска катастрофа во целата наша историја. Израел не беше на масата кога се донесуваа одлуки што се однесуваат на самата суштина на нашата национална безбедност, напиша Лапид на X.
Тој рече дека „војската направи сè што беше побарано од неа, а јавноста покажа извонредна отпорност“, но дека Нетанјаху „не успеа дипломатски и стратешки и не постигна ниту една од целите што си ги постави“.
„Ќе бидат потребни години за да се поправи дипломатската и стратешката штета што Нетанјаху ја предизвика преку ароганција, небрежност и недостаток на стратешко планирање“, продолжи тој.
Нетанјаху нагласи дека ја поддржува одлуката на американскиот претседател Доналд Трамп да ги суспендира нападите врз Иран за две недели, но истакна дека прекинот на огнот не важи за Либан. Тој рече дека ги поддржува напорите на САД да се осигура дека Иран повеќе не претставува „нуклеарна, ракетна или терористичка закана за САД, Израел и неговите арапски соседи“.
Тој додаде дека Вашингтон го информирал Израел дека останува посветен на заедничките цели во претстојните преговори. Иран објави дека преговорите со САД ќе започнат во петок, 10 април, во Исламабад.