Турскиот претседател изјави дека израелската влада го злоупотребува терористичкиот напад на палестинскиот исламистички Хамас како изговор за спроведување геноцид во Газа, рече Реџеп Таип Ердоган во својот говор пред Генералното собрание на Обединетите нации.
– Ова не е борба против тероризмот. Ова е политика на окупација, присилно раселување, егзил, геноцид или, поточно, политика на масовно убивање, спроведена под изговор на инцидентот од 7 октомври, им рече Ердоган на светските лидери собрани во Њујорк на Генералната дебата.
За време на својот говор, Ердоган покажа неколку фотографии од очајни Палестинци во Газа во центрите за дистрибуција на храна, деца кои гладуваат и уништувањето предизвикано од тешкото бомбардирање на Газа од страна на Израел во последните две години.
„Геноцидот продолжува во Газа“, рече Ердоган и додаде „Дури и сега кога се среќаваме овде, невини луѓе умираат во Газа“.
Ердоган предупреди дека „оваа лудост го храни антисемитизмот“ и им порача на светските лидери дека молчењето во ерата на вакви злосторства е еднакво на соучество.
„Мора да се договори примирје во Газа што е можно поскоро“, рече тој, додавајќи дека „тимот за геноцид“ одговорен за најновата криза „мора да биде повикан на одговорност“.
Ердоган го критикуваше израелскиот премиер Бенјамин Нетанјаху, велејќи дека нема интерес за мир и ослободување на преостанатите заложници во Газа.
Тој, исто така, се осврна на медиумското известување за војната, велејќи дека „досега, Израел намерно убил 250 новинари кои работат за национални и меѓународни медиуми во Газа и им забрани на сите да влезат во Газа“.
Специјалната известувачка на Советот за човекови права на ОН за слобода на изразување, Ирена Кан, исто така, го обвини Израел за намерно убивање новинари за да ги прикрие своите злосторства. Израел, од друга страна, го обвинува Советот за човекови права на ОН и нивните известувачи за пристрасност.