Американски и европски дипломати изјавија денеска дека се едногласни во стратегијата и својата цел за постигнување договор со Иран околу неговата нуклеарна програма.
– Имаме единствено мислење, истакна американскиот државен секретар Џон Кери по разговорот со францускиот министер за надворешни работи Лоран Фабиус.
Кери и Фабиус, кои остварија средба со шефовите на дипломатии на Велика Британија и Германија, Филип Хамонд и Франк-Валтер Штајнмаер, констатираа напредок во преговорите за иранската нуклеарна програма, кои се одржаа во средата во Швајцарија. Тие признаа дека постојат и големи несогласувања, кои треба да се надминат, доколку земјите сакаат да постигнат договор до крајот на овој месец, кога истекува крајниот рок поставен од преговарачите.
– Во одредени области има напредок, но има и несогласувања, нагласи Фабиус.
Иранскиот потпретседател Али Акбар Салехи изјави дека техничките пречки на патот кон конечниот нуклеарен договор се надминати во последните кругови од преговорите.
Салехи, кој е претседател на Иранската организација за атомска енергија, додаде дека преговарачите успеале да стават крај „на ќорсокак ситуацијата околу повеќе технички прашања“, а со цел да се надминат несогласувањата „преземени се конструктивни чекори“.
Предвидено е следниот круг од преговорите да започне на 15 март.
Кери потенцира дека Иран треба да преземе решенија, за да му докаже на светот дека нема намера да произведува нуклеарно оружје.