Австралискиот премиер Тони Абот, неочекувано, ја откажа посетата на Индонезија.
Абот ноќеска по полноќ му се јавил лично на претседателот на Индонезија Сусило Бамбанг Јудјоно, оправдувајќи го откажувањето на посетата, поради обврски поврзани со донесувањето на австралискиот буџет.
Посетата на австралискиот премиер требаше да придонесе за смалување на тензиите меѓу Џакарта и Канбера, предизвикани од индонезиското незадоволство поради интервенции на австралиската Воена морнарица во водите на Индонезија и аферата поради австралиското прислушување на телефонските разговори на индонезискиот претседател откриена минатиот месец.
Долгорочно, билатералните односи меѓу Индонезија и Австралија биле повеќе затегнати од нормални.
Во последно време дипломатите на двете земји интензивно преговараа за можностите за нормализација на односите, но тврдата австралиска политика за протерување на индонезиските бродови што превезуваат илегални емигранти кон Австралија, почна повторно да ги заладува релациите.
Провладиниот „Џакарта пост“ во денешното онлајн издание ја пренесува изјавата на портпаролот на австралиската Влада во сенка, во која се бара Абот да и каже на јавноста зошто нема да патува во Индонезија.
Опозициските лабуристи додаваат дека Индонезија е важен сосед на петтиот континент и дека сегашната Влада треба да направи многу повеќе за да се оправда пред Индонезијците.