Полската Агенција за внатрешна безбедност, во соработка со полицијата, привела руски државјанин осомничен дека планирал убиство на американско-украински државјанин во име на руските разузнавачки служби, изјави полскиот премиер Доналд Туск.
Туск рече дека осомничениот бил приведен на 7 август.
„Ова е прв случај во кој некој одлучил да изврши атентат врз американски државјанин по наредба на Русија, на територијата на друга земја членка на НАТО, поточно во Варшава, Полска“, изјави Туск.
Полскиот премиер не го откри идентитетот на лицето кое наводно било цел на атентатот, но рече дека станува збор за човек кој е „непогоден од гледна точка на режимот на Путин“.
Туск ја обвини Русија дека води хибридна војна против западноевропските земји кои ја поддржуваат Украина.
„За жал, мораме да поаѓаме од претпоставката дека режимот на Путин ќе се обиде да елиминира луѓе кои од различни причини му се непогодни, во различни делови на светот“, рече тој.
Туск додаде дека полските безбедносни служби се подготвени за слични сценарија во иднина.
„Нашите активности во оваа област ќе бидат исклучително интензивни за да спречиме понатамошни обиди насочени кон граѓани на Полска или на други држави на наша територија“, порача полскиот премиер.
Случајот доаѓа во период на зголемени тензии меѓу Полска и Русија и предупредувања од европски официјални лица за можни руски саботажи, шпионажа и обиди за дестабилизација.
Туск порача дека Европа мора да биде подготвена за дополнителен притисок и можни обиди за атентати.