Норвешкиот масовен убиец Андерс Беринг Брејвик добива во затворот писма од деца и младинци. Раководството на затворот „Ила“ смета дека проблемот е толку сериозен така што се воспоставени контакти со општинските социјални служби, јави дописникот на МИА.
– Станува збор за најразновидни писма, од детски цртежи па се до писма од политички ангажирани млади, изјави адвокатот на Брејвик, Торд Јордет.
Директорот на затворот „Ила“ не сака да го коментира ова прашање, но познато е дека се остварени контакти со социјални установи. Откако надлежните социјални служби воспоставиле контакт со родителите на децата кои му пишале на Брејвик, бројот на писмата кој тој ги добива во затворската ќелија е намален.
Затворот „Ила“ има целосна контрола врз Брејвиковото допишување и досега, меѓу другото, се стопирани 150 писма кои масовниот убиец имал намера да ги испрати на негови приврзаници и симпатизери ширум светот, јави Норвешкото радио.