Министрите за надворешни работи на Бахреин, Египет, Обединетите Арапски Емирати (ОАЕ) и Саудиска Арабија денеска одржуваат средба во бахреинскиот главен град Манама, на која се разгледува воведувањето на нови економски санкции кон Катар.
Како што објави весникот „Ал Хајат“, повикувајќи се на дипломатски извори, се очекува на средбата да бидат договорени санкции, кои „ќе имаат директни последици по катарската економија“.
Кризата околу Катар започна на 5 јуни кога овие четири земји ги прекинаа дипломатските односи со Доха и воведоа блокада и санкции кон земјата, обвинувајќи ги катарските власти за поддршка на тероризмот и на исламските екстремисти. Властите во Доха ги отфрлија ваквите обвинувања, тврдејќи дека овие мерки се одмазда на Саудиска Арабија поради пријателските врски и соработка на Катар со нејзиниот регионален ривал Иран.
Напорите на неколку земји, меѓу кои и Кувајт, САД и Турција, за надминување на кризата досега не вродија со плод.
Откако Саудиска Арабија и ОАЕ ги затворија своите копнени граници кон Катар, во земјата се појави недостиг на храна и основни намирници, по што Турција и Иран почнаа да и доставуваат прехранбени продукти на државата.