Според чешкиот премиер Бохуслав Соботка, Чешка ќе има коментари кон предлог-санкциите на Европската унија против Русија, јави дописникот на МИА од Прага.
Предложените мерки кои треба да се однесуваат на финансискиот пазар или испораките на оружје, а за кои ќе се гласа в среда, чешката Влада ги добила денеска од Европската комисија.
Соботка, претходно најави дека од чешка страна постојат некакви резерви во однос на некои санкции, кои би придонеле за несразмерно големи економски штети.
-Ние мора да дејствуваме, земајќи ги предвид интересите на Чешка и ЕУ. Мислам дека Европа не треба со овие санкции самата себеси да си наштети. Ескалацијата на санкциите ја сметам за многу ризична работа, рече Соботка, додавајќи дека опасноста лежи и во руските одговори кон санкциите на ЕУ.