Бугарскиот парламент го поддржа предлогот на бугарската влада да ѝ се дозволи на американската војска да користи воздухопловна база во земјата за поддршка на американските операции на Блискиот Исток.
Бугарските пратеници гласаа со 136 гласови „за“, 13 „против“ и двајца „воздржани“ за да се дозволи распоредување на до осум американски авиони за полнење гориво KC-135, заедно со 250 лица и опрема, во воздухопловната база Безмер од петок до 1 октомври, објави АП.
Новото воено распоредување дојде откако Бугарија беше замолена да го стори тоа од Амбасадата на САД во Софија, соопшти агенцијата.
Пред гласањето, бугарскиот премиер Румен Радев изјави дека е „категорично исклучено“ воените операции на Блискиот Исток да се спроведуваат од бугарска територија.
Тој на состанокот на кабинетот изјави дека распоредувањето на американски авиони за полнење гориво во воздухопловната база Безмер е наменето исклучиво за логистички мисии, односно полнење гориво за време на летови надвор од бугарскиот воздушен простор.
Министерот за одбрана Димитри Стојанов им рече на пратениците пред гласањето дека се преземени сите потребни мерки, како на национално ниво, така и во рамките на сојузничките обврски, за да се осигури дека Бугарија нема да биде вовлечена во никаков конфликт.
„Побаравме и добивме гаранции од нашиот стратешки партнер насочени кон минимизирање на ризиците за нашата национална безбедност“, рече Стојанов.
Врз основа на договорот за одбрана меѓу САД и Бугарија од 2006 година, базата Безмер, која се наоѓа на околу 260 километри југоисточно од главниот град Софија, е објект што го делат двете земји.