Доколку САД продолжат да инсистираат на „Трансатлантското трговско и инвестициско партнерство“ (ТТИП) во сегашната форма може да пропадне целиот договор, изјави денеска германскиот вицеканцелар и министер за економија Зигмар Габриел.
Пред посетата на Обама кој по Велика Британија денеска пристигнува во Германија. лидерот на Социјал-демократите вели дека ако Американците сакаат да ја задржат оваа форма на договорот, ТТИП ќе пропадне.
– Американците сакаат да ја наметната идејата „Купувај американско“ а ние не можеме да го прифатиме тоа. Според мене тоа веќе не е слободна трговија , изјави Габриел за весникот „Ханделсблат“.
Централна тема на разговорите што претседателот Обама ќе ги има со своите германски домаќини е трговскиот договор кој беше причина за протести во градот Хановер каде што дваестина илјади луѓе протестираа против партнерството кое може да ги намали правата на европските потрошувачи.