Над 30.000 луѓе од цел свет учествуваат во операциите на терористичката групација Исламска држава во Ирак и Сирија, изјави денеска генералниот секретар на ОН Бан Ки-мун за време на седница на СБ на ОН.
Тој повика да се реши проблемот со поддршката на терористите од владите на некои држави.
– Над 30.000 луѓе од цел свет се членови на ИД во Ирак и Сирија. Тие странски борци ќе бидат сериозна закана за безбедноста во своите држави и на трети држави кога ќе се вратат, нагласи Бан.
Тој вели дека ИД има приходи од незаконски акции и врбува во своите редови млади луѓе користејќи и интернет и социјални мрежи.
Бан вели дека со таа појава треба да се води борба на сите нивоа. Тој повика државите да преземат поконкретни чекори за спречување на незаконска трговија на ИД со нафта и природен гас и со предмети што се национално богатство.