Советот за безбедност на ОН повика на итно примирје во Газа по итниот состанок зад затворени врати, по најкрвавиот ден од почетокот на копнената офанзива на израелската армија, во која загинаа над 100 Палестинци и 13 израелски војници.
Во текот на две недели на воениот судир меѓу Израел и исламистичките сили на Хамас загинале повеќе од 400 лица, најмногу цивилно население.
Генералниот секретар на Обединетите нации, Бан Ки-Мун, кој се наоѓа во посета на Блискиот Исток, со намера да изнајден мировен план за Газа, ја осуди „ужасната акција“ и повика на итен прекин на огнот.
„Израел мора да покаже максимална воздржаност и да направи многу повеќе за заштита на цивилите“, рекол Бан, нагласувајќи дека мора да се почитува хуманитарното право. Денеска во Египет пристигнува американскиот државен секретар Џон Кери во мисија за изнаоѓање посредник меѓу завојуваните страни во појасот Газа.