Австрискиот министер за одбрана Норберт Дарабош заминува од оваа функција со цел да преземе нова должност во својата партија Социјалдемократска партија на Австрија (СПО), соопштено е синоќа во Виена.
На негово место ќе биде поставен правникор Гералд Клуг, кој за разлика од Дарабош отслужил воен рок и активно ќе учествува во реформите на армијата.
Дарабош претрпе тежок пораз на почетокот на годинава кога Австријците на референдум гласаа против неговиот предлог за професионализација на војската и укинување на воената обврска.
Австрискиот канцелар и лидер на СПО Вернер Фајман ја соопшти рокадата во Владата по седницата на партиското претседателство.
Како што најави Фајман, Дарабош ќе биде нов генерален секретар на партијата и шеф на предизборната кампања, бидејќи на есен во Австрија треба да се одржат парламентарни избори.