Австрискиот канцелар Вернер Фајман повика за итна средба на врвот на ЕУ по прашањето за бегалците, нагласувајќи дека подготвеноста на неговата држава да прифати бегалци е само времено и израз на добра волја да се помогне во кризна ситуација.
Според Фајман треба итно да биде усвоена заедничка политика на ЕУ за бегалците.
Австрија се согласи во петокот да го олесни приемот и транзитот на илјадници бегалци, заглавени во Унгарија, на пат кон Германија. За таа цел земјата обезбеди десетици бесплатни возови.
– Мерка од таков вид не може да биде решение на проблемот, предупреди Фајман, додавајќи дека е потребна итна средба на врвот на ЕУ, веднаш по средбата на министрите за внатрешни работи на земјите членки на ЕУ, закажана за 14 септември.