Шефовите на здружената команда на вооружените сили на Еквадор и затворската управа на оваа латиноамериканска држава поднесоа оставки, соопшти денеска владата во Кито.
Оставките уследија заради затворската криза по масакрот во затворот во Гвајакил и борбата против трговијата со дрога.
Еквадорскиот претседател, Гиљермо Ласо, ја „прифати оставката“ на шефот на здружената воена команда, вицеадмирал Хорхе Кабрера, и на директорот на агенцијата задолжена за затворите (СНАИ), Боливар Гарсон, се наведува во соопштението од еквадорското претседателство.
Во судири меѓу ривалските банди во затворот во Гвајакил, во југозападниот дел на Еквадор, во ноќта меѓу петокот и саботата, загинаа 68 затвореници, соопштија властите.
Ова беше последен во серијата масакри во проблематичниот затворски систем на Еквадор, а борбите траеле со часови во текот на ноќта.