Припадници на безбедносните сили и локалните жители – будисти, убиле 10 муслимански Рохинџи во селото Ин Дин, информираше денеска армијата на Мјанмар.
Ова е прв случај армијата на земјата да преземе одговорност за убиство на цивили Рохинџи, откако летово беше интензивиран конфликтот меѓу будисите и муслиманите во западен Мјанмар.
– Точно е, селаните и безбедносните сили признаа дека убиле 10 Рохинџи. Војската ќе ги повика на одговорност лицата кои ги прекршиле наредбите. Овој инцидент се случил затоа што терористите им се заканувале на селаните кои се будисти, соопшти армијата.
Масовната гробница со телата на убиените муслимани беше пронајдена во декември, а според проценките повеќе од 650 илјади Рохинџи беа протерани од Мјанмар во текот на летото. Тие сега се наоѓаат во кампови во соседниот Бангладеш.