Палестинскиот претседател Махмуд Абас синоќа изјави дека најновата војна меѓу израелската војска и Хамас ја истакна потребата за изнаоѓање на трајно решение со Израел.
– Што е следното? Газа доживеа три војни. Дали да очекуваме нова војна за година или две? Дали дотогаш тоа прашање ќе биде без решение, изјави Абас во телевизиското обраќање до Палестинците од своето седиште во Рамалах во Западен Брег.
Советниците на Абас наведоа дека тој ќе побара од Советот на безбедност на Обединетите нации повлекување на Израел од сите територии окупирани во шестдневната војна во 1967 година, со цел да се овозможи создавање на независна Палестина.
Се очекува Абас, лидерот на секуларен Фатах, ривал на Хамас, под чија контрола е Појасот Газа, да има главна улога во секој нов договор за режимот на границите. Абас ја изгуби контролата над Појасот Газа во средината на 2007 година. Оттогаш Абас го контролира само Западниот Брег.