Во момент кога нашата земја се соочува со една од најтрагичните еколошки катастрофи во последните децении, Левица изразува длабока загриженост и револт поради неспособноста на Владата да ги заштити нашите шумски богатства – изгореа над 94 000 хектари шума или 9,5 % од вкупната шумска површина, а одговорност нема, се наведува во соопштението од партијата.
Пожарите што ја зафатија Македонија, не се само природна несреќа – тие се директен резултат на систематски пропусти и игнорантност кон животната средина.
Според податоците на Европскиот информативен систем за шумски пожари (EFFIS), оваа година во Македонија изгореа над 94,000 хектари шума – бројка што е, речиси, еднаква на вкупните уништени шуми во последната декада.
Ова е алармантен показател за неспособноста на Владата да управува со природните ресурси и да се справи со заканите од климатските промени.
Шумите, кои претставуваат околу 983,000 хектари од нашата земја, се сериозно загрозени со 9.5% од вкупната шумска површина – уништена само за една година.
Одговорноста за оваа катастрофа директно треба да ја понесе Владата поради:
Недостаток на превентивни мерки:
И покрај познатите ризици, не беа преземени адекватни чекори за спречување на пожарите, ниту за едукација на населението за потенцијалните опасности.
Недоволно финансирање и опремување: Противпожарните единици останаа без соодветна опрема и со недоволно кадри, и покрај ветувањата за подобрување на нивните услови.
Бавна и хаотична реакција:
Кога пожарите веќе избувнаа, реакцијата беше бавна и некоординирана, што доведе до поголеми штети отколку што беше неопходно.
Отсуство на одговорност:
До денес, нема јасни одговори за тоа како и зошто се случи ова, ниту се преземени чекори за одговорност на одговорните лица.
Како одговор на овие пропусти, Левица бара:
Истрага и одговорност:
Да се спроведе независна истрага за да се утврдат одговорностите и да се осигура дека виновниците ќе одговараат!
Инвестиции во противпожарна заштита: Да се инвестира во модерна противпожарна опрема и обука, но и да се воспостави систем за рано предупредување!
Обнова на шумите:
Веднаш да се започне со процес на пошумување и обновување на засегнатите области, воведувајќи ги и програмите за одржување на новите насадувања!
Левица останува на страната на природата и граѓаните. Во услови на оваа еколошка криза, државата треба силно и решително да вложи во заштита и обновување на шумите, но и итно обновување на државната противпожарна инфраструктура со цел превенција на идни катастрофи.
Само со одлучни мерки и вистинска грижа за природата, ќе можеме да обезбедиме здрава и одржлива иднина за идните генерации, наведуваат од Левица.