Виљареал со победата во последното коло од шпанската Сегунда го обезбеди второто место на табелата и по една година се враќа во елитната Примера.
Популарната „Жолта подморница“ во последното коло со 1-0 славеше пред илјадниците свои фанови против Алмерија, со која го освоија второто место за директен пласман во најквалитетното шпанско фудбалско натпреварување.
Со пет бода предност лигата ја освои Елче, додека во плејофот за третото место меѓу елитата ќе се натпреваруваат Алмерија, Жирона, Алкоркон и Лас Палмас.
Виљареал минатата сезона испадна од Примера по сериозните финансиски проблеми во кои се најде, но и по неколкуте многу успешни сезони во Лигата на шампионите и Лигата на Европа, неретко успешно парирајќи им на гигантите Барселона и Реал Мадрид.
И покрај елиминацијата, Виљареал задржа голем дел од своите талентирани и искусни играчи, како на пример екс-репрезентативецот Маркос Сена, и со поддршка од верните фанови експресно се вратија назад каде што заслужуваат да бидат.