Германскиот министер за финансии Волфганг Шојбле денеска изјави дека секоја нова грчка влада ќе треба да се придржува кон веќе постигнатите договори.
Изјавата на Шојбле е во момент кога Грција се соочува со предвремени парламентарни избори, на кои на власт може да дојде опозицијата која е против спасувачкиот пакет мерки на земјата.
Грчката Влада има трета и последна шанса во понеделник да избере нов претседател. Ако претседателот не биде избран, ќе бидат закажани парламентани избори.
Според најновите анкети партијата СИРИЗА, која се залага за нови преговори за спасувачката програма за земјата, има благо водство.
Германскиот министер за финансии Волфганг Шојбле изјави за весникот „Билд“ дека ќе продолжи со поддршка на Грција на патот на реформите, но ако Атина избере друг пат тоа ќе биде тешко.
Шојбле изјави дека новите избори нема да променат ништо, кога станува збор за долговите на Грција. Според него секоја нова Влада ќе треба да се придржува кон законските договори на своите претходници.