Познатиот шпански фудбалски тренер Хуанде Рамос ја напушти клупата на Малага поради серијата слаби резултати, соопшти клубот од Андалузија.
Елиминацијата од второлигашот Кордоба во Копа дел Реј, како и само една победа на петте последни натпревари во Примера, значеа крај на вториот мандат на Рамос во Малага по седум месеци.
Шпанскиот клуб објави дека договорот е раскинат со согласност од двете страни.
Наследникот на 62-годишниот Рамос на тренерската позиција на Малага ќе биде познат до 8 јануари кога продолжуваат натпреварите во Примера.
Малага се наоѓа на 11-то место во шпанскиот шампионат со 21 бод по 16 одиграни рунди.